Их Британийн үндэсний агаарын тээврийн Бритиш Эйрвэйс компани долоодугаар сард үйлдэхээр төлөвлөөд байсан 1500 орчим нислэгээ цуцалжээ.

Өнгөрөгч амралтын өдрүүдэд тохиосон олон зуун нислэгийн саатал нь ийнхүү энэ зун нисэхээр төлөвлөөд байсан олон арван мянган хүний аялалд нөлөөлөх болсон байна.

Коронавируст цар тахлаас хойш эргээд сэргэж байсан Их Британи улсын агаарын тээврийн салбарын хувьд ажиллах хүчний хомсдол урт хугацаанд үргэлжилж, энэ жил үйлдэхээр төлөвлөөд байсан нийт нислэгийн 10 хувийг цуцалсан ч тийнхүү нислэг саатал үргэлжилсээр байгаа юм. Улмаар тэд дахин төлөвлөгөөгөө танахаас өөр аргагүйд хүрч байгаа ажээ.

Бритиш Эйрвэйс компанийн хэвлэлийн төлөөлөгчийн мэдэгдсэнээр, “Бидний зүгээс энэ оны эхэнд урьдчилан сэргийлэх арга хэмжээг аль болох эрт авч, үйлчлүүлэгч нартаа зуны аяллаа дахин төлөвлөх хангалттай хугацааг олгохоор хичээн ажилласан. Харамсалтай нь агаарын тээврийн салбар бүхэлдээ түүхэн дэх хамгийн хэцүү цаг үетэй тулгарч буй энэ үед бид дахин нислэгийн төлөвлөгөөгөө танахаас өөр аргагүй байдалд хүрч байна.

Үйл явдлын хүрээнд бид үйлчлүүлэгч нараасаа хүлцэл өчиж, тэдэнд нислэгээ хойшлуулах эсхүл нөхөн төлбөр авах гэсэн 2 сонголтыг өгч байгаа” гэсэн юм.

Эх сурвалж: BBC