Норвеги улс Их Британийн байгалийн хийн импортыг тасалдуулж болзошгүй нөхцөл үүсгээд байсан газрын тос, байгалийн хийн салбарт ажиллагсдын ажил хаялтыг зогсоожээ.

Их Британи улсын хувьд байгалийн хийн импортынхоо 77 хувийг Норвеги улсаас татан авдаг юм. Гэвч энэ долоо хоногийн даваа гарагт Норвегийн газрын тос, байгалийн хийн холбоо болоод Ледерне-байгалийн хий, газрын тосны салбарт ажиллагсдын холбооны хооронд цалин мөнгөний маргаан дэгдсэнээр ажилчид ажил хаялт зарласанаас үүдэн Их Британийн хийн импорт тасалдаж болзошгүй нөхцөл үүссэн байна.

Тэгвэл Норвеги улсын хөдөлмөрийн яамнаас лхагва гарагт баталснаар ажилчид ирэх долоо хоногт ажил хаялтаа өндөрлүүлэх болжээ.

Ледерне холбооны тэргүүн Аудун Ингвартсены Ройтерс агентлагт мэдэгдсэнээр “Ажилчид аль болох хурдан ажилдаа эргэн орох болно. Бидний зүгээс төлөвлөгөөт ажил хаялтаа цуцлах боллоо” гэсэн байна.

Үйл явдлын хүрээнд Их Британийн Бизнесийн танхимаас тус улсад байгалийн хийн нийлүүлэлттэй холбоотой ямар нэг асуудал гараагүй гэдгийг баталжээ.

Эх сурвалж: BBC