Украин улсын зүгээс Оросын эзлэн түрэмгийлэл эхэлснээс хойш тэдний үйлдсэн гэх 21 мянга гаруй дайны гэмт хэрэг болоод түрэмгийллийн шинжтэй гэмт хэргийг шалгаж байгаагаа мэдэгджээ.
Тодруулбал, Украины ерөнхий прокурор Ирина Венедиктовагийн BBC агентлагт хэлснээр, түүнд өдөрт дунджаар 200-300 орчим дайны гэмт хэргийн тухай гомдол ирж байгаа гэсэн юм. Улмаар хатагтай Венедиктовагийн мэдэгдсэнээр үйл явдлын хүрээнд олон шүүх хурал яллагдагч тал буюу Оросын оролцоогүйгээр явах гэнэ.
Гэвч ОХУ-ын талаас тэдгээр гэмт хэргийг үйлдсэн гэдгээ үгүйсгэж байгаа юм.
Харин Ирина Венедиктовагийн анхааруулснаар тэдний ард иргэдийг зовоож, хүчиндэж, хөнөөсөн Оросын цэргүүд шүүхэд дуудагдах нь ердөө цаг хугацааны асуудал болохыг ойлгох хэрэгтэй гэжээ.
Украины талаас тийнхүү өөрсдийн газар нутгийн хүрээнд мөрдөн шалгах ажиллагааг явуулж байгаа ч зарим хэргийг шалгах боломжгүй байгааг дурдсан байна. Учир нь Украины зарим бүс одоогоор ОХУ-ын мэдэлд байгаа юм.
Ташрамд дурдахад Украин улс дайны гэмт хэргийн хамгийн анхны хэрэгтнийг өнгөрөгч тавдугаар сард яллаж, бүх насаар нь хорих ял оноосон байна. Ял сонссон этгээдийн тухайд гэвэл Оросын армийн дэд ахлагч Вадим Шишимарин гэх цэрэг бөгөөд түүний үйлдсэн гэмт хэрэг нь Украины энгийн иргэнийг хөнөөсөн гэнэ.
Эх сурвалж: BBC