ОХУ-ын талаас "Нордстрим-1" хийн хоолойгоор дамжуулан Германд нийлүүлдэг байгалийн хийгээ зогсоохоо мэдэгдсэн бол харин Итали улсад хийн нийлүүлэлтийн хэмжээгээ бууруулж байгаагаа дамжуулжээ.
Италийн эрчим хүчний томоохон компани болох Eni орон нутгийн цагаар 11-ний өдөр өөрийн цахим хуудаснаа "ОХУ-ын төрийн өмчит Газпром компани өдөрт дунджаар 32 сая куб метр хий нийлүүлдэг байсан бол өнөөдөр ердөө 21 сая куб метр хий нийлүүлэх болсноо мэдэгдлээ” хэмээн цохон тэмдэглэв.
Мөн Газпром компанийн зүгээс засвар үйлчилгээ хийх нэрийдлээр Герман руу байгалийн хий нийлүүлдэг "Нордстрим-1" хоолойн үйл ажиллагааг арав хоногийн турш зогсоохоо мэдэгдсэн бөгөөд мөн өдөр эхний өдөр нь юм.
ОХУ-ын хувьд Итали, Герман улсуудад нийлүүлдэг хийн хэмжээгээ хязгаарлах, багасгах зэрэг үйлдэл гаргаж буй анхны тохиолдол биш билээ.
Тодруулбал ОХУ-ын эсрэг авч хэрэгжүүлж буй барууны хориг арга хэмжээний улмаас хийн хоолойн эд ангиудыг хугацаанд нь авах боломжгүйд хүрсэн талаар Газпром компани өнгөрсөн сарын 14-ний өдөр мэдэгдэн, “Нордстрим-1” хоолойгоор нийлүүлдэг хийн хэмжээг 40 хувиар бууруулахаа анхааруулж байсан юм.
Герман улсын хувьд эрчим хүчнийхээ гуравны нэгээс илүү хувийг ОХУ-бн нийлүүлдэг байгалийн хийгээр хангадаг бол Итали улс жилд импортолдог нийт хийн хэмжээнийхээ 40 гаруй хувийг тус улсаас авдаг аж.
Италийн Eni компанийн зүгээс ОХУ-аас үргэлжлүүлэн байгалийн хий импортлохын тулд тус улсын эрх баригчдын шаардлагын дагуу өнгөрөгч 5-р сард Оросын банкинд рублийн данс нээлгэх зэргээр арга хэмжээ авсан хэдий боловч Газпромын гэнэтийн шийдвэрээс “бултаж” чадсангүй.
Эх сурвалж: SBS
Zuv.