Мягмар гарагт Бразил улсын Гадаад хэргийн сайд Карлос Алберто Франко Франка ОХУ-аас их хэмжээний эрчим хүчний нөөц худалдан авах хүсэлтэй байгаагаа илэрхийлжээ.
Түүний мэдэгдсэнээр, “ОХУ бол бидний стратегийн түнш. Бид БРИКС группт ч түншилдэг. Бразил улс ОХУ болон Беларусийн бордооны экспортоос үлэмж хэмжээний хамааралтайгаар газар тариалан эрхэлдэг.
ОХУ бол байгалийн хий, газрын тосны маш сайн нийлүүлэгч. Та бүхэн энэ талаар ХБНГУ болоод Европ тивээс ч лавлаж болно.
Бидний зүгээс хөдөө аж ахуйн бизнесийн байгууллагууд болоод жолооч нартаа хүрэлцээтэй дизель түлшний нөөцийг бүрдүүлэх учиртай. Тиймээс бид итгэж болохуйц нийлүүлэгч хайж байгаа. Харин ОХУ бол найдаж болохуйц нийлүүлэгчдийн нэг.
Харин хэдий хэр хэмжээний эрчим хүч худалдан авах тухайд гэвэл бид чадах чинээгээрээ ихийг авах болно” гэжээ.
Эх сурвалж: ТАСС