ОХУ Америкийн үндэстэн дамнасан компани болох Гүүглийг “хууль бус контент”-ыг хязгаарлаагүй гэсэн үндэслэлээр торгожээ.
Тодруулбал, Гүүглийн хайлтын систем ОХУ-ын нутаг дэвсгэрээс хайлт хийхэд Украин улс дахь дайны тухай болон бас бус контентыг Оросын хуульд нийцүүлэн хязгаарлах ёстой байсан юм. Гэвч тэд тэдгээр контентод хязгаарлалт хийлгүй хайлтын илэрцэд үзүүлсэн тул тийнхүү 21.1 тэрбум рублиэр торгуулжээ.
ОХУ-ын харилцаа холбооны зохицуулагч Роскомнадзороос мэдэгдсэнээр Гүүгл Оросын цэрэг армийн нэр хүндийг гутаасан “үндэслэлгүй” мэдээлэл болоод олон нийтийг эсэргүүцлийн жагсаалд уриалсан мэдээлэлд хязгаарлалт хийлгүй хууль зөрчсөн гэнэ. Тэдний зүгээс Гүүгл компанийг Оросын хуулийг нарийн тогтолцоотойгоор зөрчигч хэмээн тодорхойлсон юм.
Үйл явдлын хүрээнд Гүүгл компаниас ямар нэг мэдэгдэл хийгээгүй байна.
Эх сурвалж: BBC