Хятадын амралт зугаалгын бүс болох Бэйхай хотод коронавирусийн халдвар бүртгэгдсэнээр засгийн газраас хөл хорио тогтоож, 2000 гаруй аялагч тухайн хотод гацжээ.

Улмаар албаныхны зүгээс тус хотын 1.9 сая оршин суугчийг коронавирус илрүүлэх масс шинжилгээнд хамруулах болсон бөгөөд коронавирус тээгчтэй ойрын хавьтал болоогүй, дунд эсвэл өндөр эрсдэлтэй бүсүүдээр зорчоогүй аялагчийг шинжилгээнд хамруулж, сөрөг хариу гарсан тохиолдолд нутаг буцахыг зөвшөөрөхөөр шийдвэрлэсэн байна.

Бэйхай хотод энэ сарын 11-16-ны өдрүүдэд коронавирусийн нийт 450 шинэ тохиолдол бүртгэгдсэн юм. Энэ нь олон улсын жишгээр бол харьцангуй бага үзүүлэлт хэдий ч БНХАУ-ын “0 КОВИД” бодлогын хувьд хангалттай өндөр үзүүлэлт ажээ.

Хятад улсын хувьд “0 КОВИД” бодлогын улмаас эдийн засаг нь хүндхэн нөхцөлд ороод байгаа бөгөөд өнгөрөгч баасан гарагт засгийн газраас нийтэлсэн дата мэдээллээс үзвэл тус улсын эдийн засгийн өсөлт энэ оны хоёрдугаар улиралд огцом буурсан байна. Тодруулбал, тус улсын ДНБ л гэхэд өнгөрөгч улиралд энэ оны нэгдүгээр улирлаас даруй 2.6 хувиар буурсан дүн гарчээ.

Эх сурвалж: BBC