Их Британи улсын зүгээс Украинд танк эсэргүүцэх систем, их буу, дрон зэргийг нэмэлт тусламж болгон илгээхээр шийджээ.
Их Британийн Батлан хамгаалахын сайд Бен Уоллес орон нутгийн цагаар 21-ний өдөр мэдэгдэл хийхдээ "ОХУ-ын халдан түрэмгийллээс Украинчуудыг эх орноо хамгаалахад нь зэвсгийн тусламж үзүүлсээр байх болно” хэмээн уг шийдвэрийнхээ талаар олон нийтэд зарласан байна.
Тэрээр хэлэхдээ энэ удаад 1600 танк эсэргүүцэх зэвсэг, олон зуун дрон, их бууны радарын систем, 50,000 гаруй сум зэргийг илгээхээр болсноо мэдэгдэв.
Түүний хэлснээр 155 миллметрийн өөрөө явагч M109 их буу 20 гаруйг, мөн 105 миллметрийн L119 их буу 36 ширхгийг тун удахгүй Украинд хүргэх гэнэ.
"Энэ удаагийн дэмжлэгийн цар хүрээ хийгээд хэмжээг харахад л бидний шийдвэрийн сүр хүчийг мэдэрч болно” хэмээн тэрээр цохон тэмдэглэжээ.
Их Британийн ерөнхий сайд Борис Жонсон өнгөрсөн сард Украинд нэмэлт нэг тэрбум фунт стерлингийн цэргийн тусламж үзүүлэхээ амласан билээ. Ингэснээр Их Британийн Украинд үзүүлсэн нийт тусламжийн хэмжээ 2.3 тэрбум фунт стерлинг болж буй юм.
Өнгөрсөн хугацаанд Их Британи Улс Украинд 7000 танк эсэргүүцэх зэвсэг, олон зуун пуужин нийлүүлснээс гадна цэргийн сургуулилтад оролцон дэмжлэг үзүүлсэн байна.
Эх сурвалж: Yonhap