Ойрын хугацаанд агаарын тээврээр зорчсон хүмүүс дэлхий дахины агаарын тээврийн салбар ямар их асуудалтай байгааг анзаарсан байх. Олон улсын нисэх буудлууд ажиллах хүчний хомсдолтой байгаа энэ үед хэт халалт, хүчтэй шуурга, их хэмжээний борооноос үүдэн нислэг саатах нь энүүхэнд.
Тэгвэл нислэгийн саатал, цуцлалтын хүрээнд CNN сувгаас нэгэн судалгаа гаргажээ. Судалгааг тэд FlightAware гэх нислэгийн мэдээллийн платформ дээрх тоон баримтад(2022.05.26-2022.07.19) үндэслэсэн юм.
Улмаар энэ зун Канад улсын Торонто Пийрсон Олон улсын нисэх буудал төлөвлөгөөт нислэгийнхээ 52.5 хувийг товлосон цагт нь хөөргөөгүй тул хамгийн их нислэг саатсан нисэх буудлаар тодорсон байна.
Харин Торонто Пийрсон Олон улсын нисэх буудлын дараагаар ХБНГУ-ын Франкфурт нисэх буудал төлөвлөгөөт нислэгийнхээ 45.4 хувийг цагт нь хөөргөж чадаагүй гэсэн үзүүлэлттэйгээр хоёрт бичигджээ.
Судалгааны хүрээнд нислэг саатлын хувиар тэргүүлсэн 10 нисэх буудлын долоо нь Европын нисэх буудлууд байсан юм.
Тэгвэл нислэг цуцалсан хувиар БНХАУ-ын Шэньчжэнь Баоань нисэх буудал дэлхийд нэгдүгээрт бичигдсэн бол тэдний араас АНУ, Канад, Индонез, Австрали болон Нидерландын нисэх буудлууд эхний аравт багтжээ.
Эх сурвалж: CNN