Даваа гарагт Кремлийн хэвлэлийн төлөөлөгч Дмитрий Песковын мэдэгдсэнээр, ОХУ-ын ерөнхийлөгч Владимир Путин Японы ерөнхий сайд агсан Абэ Шинзог оршуулах ёслолд биечлэн оролцох төлөвлөгөөгүй байгаа гэжээ.

Түүний хэлснээр, “Ерөнхийлөгчийн хувьд Япон улсад айлчилж, оршуулах ёслолд оролцох төлөвлөгөөгүй байгаа. Бидний зүгээс оршуулах ёслолд аль түвшний төлөөллөө явуулахыг ойрын хугацаанд шийднэ. Ямартай ч Путин оршуулах ёслолд оролцохгүй” гэсэн байна.

Ерөнхий сайд агсан Абэ Шинзогийн хувьд энэ сарын 8-ны өдөр цээжиндээ хоёр удаа буудуулж, шархаа даалгүй амиа алдсан юм. Улмаар түүнийг оршуулах ёслолыг ирэх есдүгээр сарын 27-ны өдөр зохион байгуулахаар төлөвлөжээ.

Токио хотын Будокан Аренад зохион байгуулагдах оршуулах ёслолд олон улсын төрийн тэргүүд, элч төлөөлөгч нар оролцох товтой байгаа юм.

Даваа гарагт Засгийн газрын хэрэг эрхлэх албаны дэд дарга Сэйжи Кихарагийн мэдэгдсэнээр тэд Япон улстай дипломат харилцаатай бүх оронд оршуулах ёслолын тов, хаана болох тухай мэдээг хүргэсэн гэжээ.

Эх сурвалж: ТАСС