Украины засгийн газар Хар тэнгисийн боомтуудын үр тарианы экспортыг энэ долоо хоногоос эхлүүлэх төлөвтэй байгаа талаараа мэдэгдэв.
Украины Дэд бүтцийн сайд Александр Кубраков энэ долоо хоногт үр тарианы экспортын ачилтыг эхлүүлнэ гэж найдаж байгаагаа хэвлэлийн бага хурал дээр хэлсэн тухай Ройтерс агентлаг мэдээллээ.
"Ойрын хоёр долоо хоногт үр тариа экспортлох бэлтгэл ажлыг Одесса боомтоос гадна өөр гурван боомтууд дээр дуусгах болно" гэж тэрээр мөн онцлон тэмдэглэв. Тэрээр үргэлжлүүлэн “хэрэв бид Хар тэнгисийн боомтуудаар дамжих экспортоо сэргээсэн тохиолдолд сард дор хаяж 1 тэрбум ам.долларын импортын худалдаа хийх боломжтой болно” гэжээ.
Украины Дэд бүтцийн яамны холбогдох албан тушаалтан "Бид эхний ачааны хөлөг онгоцыг орон нутгийн цагаар 27-ны өдөр Чорноморск хотоос хөдөлгөнө гэж найдаж байна" хэмээн цохон тэмдэглэсэн байна.
Тодруулбал өнгөрөгч 22-ны өдөр Украин, ОХУ, НҮБ, Турк зэрэг дөрвөн тал Хар тэнгисээр дамжуулан үр тариа экспортлох хэлэлцээрт гарын үсэг зурсан билээ. Гэвч хэлэлцээрийн маргааш нь ОХУ үр тариа экспортлох гол боомтуудын нэг болох Одесса руу агаараас пуужингийн цохилт өгсөн нь үр тарианы экспортыг сэргээх уг гэрээний хэрэгжилтэд саад учруулах вий гэсэн болгоомжлолыг төрүүлээд байсан юм.
Энэхүү үйл явдлын талаар ОХУ-ын зүгээс “Одесса боомт дахь байлдааны хөлөг онгоц болон пуужингийн агуулахыг устгасан” гээд “Энэ нь үр тарианы экспортыг сэргээх гэрээтэй ямар нэгэн холбоогүй юм” хэмээн мэдэгджээ.
Эх сурвалж: MBC