Японы Киодо агентлагаас мэдээлснээр, мягмар гарагт тус улсын прокурорын газраас Токиогийн Олимпын зохион байгуулах хороонд ажиллаж асан Харуюки Такахашигийн гэрт нэгжлэг хийжээ.
Түүний гэрт нэгжлэг хийх болсон шалтгаан нь прокурорын газар Токиогийн Олимпод ивээн тэтгэгчээр оролцсон нэгэн компани түүний дансанд их хэмжээний мөнгө шилжүүлснийг тогтоосонтой холбоотой юм.
Тодруулбал, Японы бэлэн хувцас худалдааны Аоки Холдингс Токиогийн Олимпод ивээн тэтгэгчээр ажилласан бөгөөд тэднийг наадмын ивээн тэтгэгчээр албан ёсоор зарлахаас нэг жилийн өмнө Аоки Холдингс ноён Такахашигийн данс руу 45 сая иенийг шилжүүлсэн байжээ.
Улмаар Олимпын зохион байгуулах хороонд ажиллах нь төрийн алба хаагчаас ялгаагүй тул мөнгө, бэлэг сэлт авахыг авлигын хэрэгт тооцох юм.
Тийнхүү хэрэг өдгөө мөрдөн шалгах шатандаа явж байгаа бөгөөд ноён Такахашигийн мэдэгдсэнээр тэр огтоос хууль зөрчөөгүй гэсэн байна.
Эх сурвалж: AP News