Орон нутгийн цагаар 25-ны өдөр Ройтерс агентлагийн мэдээлснээр, АНУ-ын Эрчим хүчний яам тус улсын автомашин үйлдвэрлэгч GM болон Өмнөд Солонгосын технологийн тэргүүлэгч LG Energy Solutions компаниудын хамтран байгуулах гэж буй цахилгаан автомашины батарейны үйлдвэрт 2.5 тэрбум ам.долларын санхүүжилт олгохоор болсон тухай онцолжээ.
АНУ-ын Эрчим хүчний яамны зүгээс дээр дурдсан 2 компанийн хамтран үүсгэн байгуулсан Ultium Cells компанийн Охайо, Теннесси, Мичиган мужуудад байгуулах үйлдвэрүүдэд 2.5 тэрбум ам.долларын санхүүжилт олгохоор төлөвлөж байгаагаа тун удахгүй зарлах гэнэ.
Уг санхүүжилт нь Tesla, Ford, Nissan зэрэг томоохон автомашин үйлдвэрлэгч компаниудад олгосон Холбооны засгийн газрын Автомашины дэвшилтэт технологийн тусламжийн хөтөлбөрөөс олгогдох аж.
Ройтерс агентлагийн мэдээлснээр, тус хөтөлбөрийн зүгээс анх удаа цахилгаан автомашины батарей үйлдвэрлэгчдэд олгож буй санхүүжилт болж байгаа гэв.
Ерөнхийлөгч Жо Байден ажлаа хүлээж авахдаа уур амьсгалын өөрчлөлттэй тэмцэхийн тулд 2030 он гэхэд АНУ-ын автомашины үйлдвэрлэлийн 50 хувийг цахилгаан эсвэл хайбрид автомашинаар солино гэж мэдэгдэж байсан нь энэ салбарт хөрөнгө оруулалт ихээр хийгдэж буйтай холбоотой юм.
Эх сурвалж: MBC