ОХУ-ын ерөнхийлөгч Владимир Путин Украин улсын нутаг дэвсгэрт цэргийн тусгай ажиллагаа явуулах шийдвэр гаргаж, тус улсад цэргээ оруулснаас хойш өдгөө 160 орчим хоног өнгөрч байгаа билээ.

Тэгвэл дайн одоо ч үргэлжилж байгаа энэ үед Украин улсын ерөнхийлөгч Володимир Зеленський гэргийн хамтаар Америкийн алдарт Vogue сэтгүүлийн зураг авалтад оролцжээ. Улмаар Vogue сэтгүүлийн зүгээс ерөнхийлөгч болон тэргүүн хатагтайн зургийг өнгөрөгч мягмар гарагт нийтэлж, олны хүртээл болгосон байна.

Сэтгүүлийн нийтэлсэн зургуудад ерөнхийлөгч, тэргүүн хатагтай хоёр хөтлөлцөн суугаа болон хатагтай Зеленська хангамжийн бараа дүүртэл өрсөн байгууламжийн шатан дээр сууж байгаа зэргээр дүрслэгдсэн юм. Мөн өөр нэгэн зураг дээр Олена Зеленська бөмбөгдүүлж сүйдсэн Антонов Ан-225 Мрия онгоцны урд урт, хөх хүрэм өмсөн зургаа даруулжээ.

Тийнхүү ерөнхийлөгчийн гэр бүлийн зургууд нийтлэгдсэн даруй олон нийтийн зүгээс ихээхэн шүүмжлэл хүртэх болсон юм.

Үйл явдлын хүрээнд Скотт Презлер гэх эрхэм, “Бид яагаад Украин улсад 54 тэрбум ам.долларын тусламж илгээсэн бэ? Бид тэдэнд тусламж илгээснээр Зеленський эхнэртэйгээ Vogue сэтгүүлд гарч чадах байсан болохоор тэр гэж үү? Танай улсад дайн болж байхад та нарт зураг авхуулж байх цаг байгаа хэрэг үү?” хэмээн жиргэжээ. Түүнтэй санал нэгдсэн хүмүүс цахим орчинд өөрсдийн үзэл бодлыг илэрхийлж байсан бол тэдний үзэл бодлыг сөрөх хүмүүс ч байсан юм. Тэдний өмгөөлснөөр, ерөнхийлөгч Зеленський ийм зураг даруулснаар олон улсын анхаарал Украин улсад ирж, хүмүүс дайны тухай илүү сайн ойлголттой болж байгаа гэжээ.

Эх сурвалж: Newsweek