Пүрэв гарагт АНУ, БНХАУ-ын ерөнхийлөгчид хоёр цаг гаруй хугацаанд утсаар холбогджээ.
Дуудлагын хүрээнд тэд Тайванийн нөхцөл байдал болоод дэлхийн дахинаа тулгамдаж буй асуудлуудын талаар ярилцсан байна. Улмаар ноён Байдены зүгээс АНУ Тайванийн арлыг статусыг өөрчлөх Хятадын оролдлогыг эрс эсэргүүцэхээ анхааруулжээ.
Улмаар Жо Байден Тайванийн асуудалд АНУ-ын мөрдөж буй бодлого өөрчлөгдөөгүй болохыг хэлсэн юм. Харин БНХАУ-ын талаас түүнд “нэг Хятадын зарчим”-ыг баримтлахыг захиж, галаар тоглосон хэнбугай ч түлэгддэг гэж сануулсан байна.
Хоёр улсын хооронд ийм ширүүхэн яриа өрнөх болсон шалтгаан нь цуу яриагаар АНУ-ын Төлөөлөгчдийн танхимын дарга Нэнси Пелоси Тайваньд айлчилна гэсэнтэй холбоотой юм.
Хатагтай Пелосигийн хувьд арал дээр зочлох тухай албан ёсны мэдэгдэл хийгээгүй ч БНХАУ-ын талаас түүнийг Тайваньд айлчилбаас ноцтой үр дагавартай болохыг сануулаад байгаа ажээ.
Хоёр талын дуудлагын хүрээнд ерөнхийлөгч нар нүүр нүүрээ харж уулзах боломжийг хэлэлцсэн бөгөөд АНУ-ын талаас энэ төрлийн уулзалтыг зохион байгуулах нь илүү шударга гэсэн юм.
Эх сурвалж: BBC