БНХАУ-ын дарга Ши Жиньпин, Польшийн ерөнхийлөгч Анжей Дуда нар 29-ний өдөр утсаар холбогдон хоёр орны хамтын ажиллагааг цаашид өргөжүүлэх шаардлагатай байгааг онцолжээ.
БНХАУ-ын ГХЯ-ны мэдээлснээр, Ши Жиньпин дарга мөн өдөр ерөнхийлөгч Дудатай утсаар холбогдохдоо "Хятад улс Польш улстай тогтоосон уламжлалт найрамдалт харилцаагаа өндрөөр үнэлдэг ба Польшийг Европын хамтын ажиллагааны гол түнш гэж үздэг" гэдгээ илэрхийлсэн байна.
“Польш улстай ойр дотно харилцаатай байж, улс төрийн харилцан итгэлцлийг бэхжүүлэх замаар хоёр орны иж бүрэн стратегийн түншлэлийн харилцааны түвшинг цаашид ахиулахыг бид хүсэж байна” гэж тэрээр цохон тэмдэглэжээ.
Ши Жиньпин дарга үргэлжлүүлэн хоёр орон харилцаа, хамтын ажиллагаагаа эрчимжүүлж, Хятадын гадагш чиглэсэн төсөл болох "Бүс ба зам" санаачилгаар тогтохгүй эдийн засаг, худалдаа, ногоон хөгжил, дижитал эдийн засаг зэрэг салбаруудад хамтран ажиллах ёстой гэдгийг мөн дурдав.
"Бид Польшийн өндөр чанартай бүтээгдэхүүнийг Хятадын зах зээлд гаргах тал дээр ажиллахын ялдамд Хятадын олон компанийг Польшид хөрөнгө оруулахыг дэмжих болно" гэж тэрээр үргэлжлүүлжээ.
Харин ерөнхийлөгч Дуда хэлэхдээ, цар тахлын дэгдэлтийн нөлөөг ч үл харгалзан хоёр орны нягт харилцаа холбоо хадгалагдан үлдэж, олон салбарууд дахь хамтын ажиллагаа үргэлжлэн хөгжиж байгааг сайшаан онцолсон байна.
Тэрээр Хятад улстай эдийн засаг, худалдаа, логистик зэрэг салбарт хоёр талын хамтын ажиллагааг өргөжүүлэх хүсэлтэй байгаагаа илэрхийлж, Хятадын компаниудын Польш дахь хөрөнгө оруулалтыг дэмжиж байгаагаа илэрхийлэв.
Хоёр удирдагч Украины нөхцөл байдлын талаар мөн санал солилцсон гэж Хятадын ГХЯ мэдэгдэв.
Эх сурвалж: Newsis
Хэлсэндээ байж харилцан ашигтай наймаа хийдэгийг түнш гэхээс хамт иддэгийг түнш гэдэгүй