Өнгөрөгч баасан гарагт Европын Холбооны Гадаад бодлогын тэргүүн Жозеп Боррелль Германы Дойчэ Велле сувагт байгалийн хий, газрын тос, эрчим хүчний асуудлын хүрээнд ярилцлага өгчээ.

Ярилцлагад DW сувгийн зүгээс Европын Холбоо одоог хүртэл Оросын байгалийн хийнээс бүрэн татгалзаагүй байгаа нь дайныг санхүүжүүлж байгаа хэрэг биш гэж үү хэмээн асуусан байна.

Харин асуултын хариуд ноён Боррелль, “Бид Оросын байгалийн хийнээс ойрын хугацаанд татгалзах болно. Гэхлээ бид нэг шөнийн дотор л хийг тасалж чадахгүй. Учир нь манай холбооны зарим гишүүн орон тэдний байгалийн хийнээс маш ихээр хамааралтай оршдог. Тиймээс бид энэ хамаарлыг бууруулахаар төлөвлөн ажиллаж байна. Бидний хувьд маш богино хугацаанд 40 хувьтай байсан Оросын хийн хамаарлаа даруй хоёр дахин бууруулж, 20 хувьд хүргэж чадсан.

Та хэлэхдээ рублийн ханш чангарч байна гэж байна. Гэхдээ рубль чангарч буй нь механик нөлөөтэй хэрэг. Бид ОХУ руу бараа бүтээгдэхүүн экспортлохоо зогсоосноор тэд импортын бараа авч чадахгүй байгаа. Рублийн ханш чангарч байгаа нь эрчим хүчний үнэ өсөж байгаатай холбоотой. Гэсэн хэдий ч рубль хөрвөх чадварын хувьд сул. Тийм байхад валютын ханш өндөр байгаад ямар ч ашиггүй.

Бидний тавьсан хориг Оросын эдийн засагт маш хүчтэй цохилт өгч байгаа. Үүний нэг жишээ нь нүүрсний олборлолт, боловсруулалт, үйлдвэрлэл. ОХУ дахь нүүрсний үйлдвэрлэлийн 87 хувь, бараг 100 хувь нь зогсонги байдалд орсон” хэмээжээ.

Эх сурвалж: DW