Газар нутгийнх нь 80 гаруй хувийг элсэн цөл эзэлдэг Арабын Нэгдсэн Эмират улсад (АНЭУ) үер болж, хүмүүсийн гайхшийг төрүүлж байна.

CNN зэрэг гадаадын хэвлэл мэдээллийн хэрэгслүүдийн орон нутгийн цагаар 31-ний өдөр мэдээлснээр, АНЭУ-ын Фүжайра, Шаржа мужид 27-ны өдрөөс эхлэн хоёр өдрийн турш хүчтэй аадар бороо орсны улмаас барилга байгууламж эвдэрч, зам гүүр хаагдах зэргээр их хэмжээний хохирол учирчээ.

Уг үйл явдлын улмаас аюултай бүс нутагт байсан 800 гаруй хүнийг аварч, 4000 гаруй хүнийг нүүлгэн шилжүүлсэн байна. АНЭУ-ын засгийн газрын зүгээс одоогийн байдлаар нийт долоон хүн, түүний дотор ази иргэд нас барсныг зарлав.

АНЭУ-ын засгийн газрын зүгээс иргэд, оршин суугчдыг гадагш гарахаас зайлсхийж, зөвхөн зайлшгүй шаардлагатай тохиолдолд ажилдаа явахыг зөвлөж байгаа аж. Түүнчлэн тус улсын засгийн газар “Түүхэн дэх хур тунадасны хэмжээгээр долдугаар сард ийм их бороо орсон нь сүүлийн 27 жилд анх удаа болж байна” хэмээн онцлон тэмдэглэв.

Үүний зэрэгцээ үерийн улмаас орон сууцны барилга байгууламжуудад цахилгаан тасраад байгаа ба сүүлийн өдрүүдэд үргэлжилж буй хэт халалтыг иргэд ямар нэгэн сэрүүцүүлэх төхөөрөмжгүй өнгөрүүлж байгаа аж. Одоогийн байдлаар тус улсад өдөртөө 40 хэмээс дээш халж байгаа гэв.

Эх сурвалж: Fnnews