Даваа гарагт Кремлийн хэвлэлийн төлөөлөгч Дмитрий Песков, Норд Стрийм шугамын турбиныг тойрсон асуудлуудыг барууныхан зохиомлоор хүндрүүлж байгаа тул ОХУ-ын талаас асуудлын хүрээнд хийж чадах зүйл өчүүхэн гэж мэдэгджээ.

Түүний хэлснээр, “Надад Норд Стрийм шугамын турбины засвар хийгээд ажиллах хүчин чадлын хязгаарын хүрээнд нэмж хэлээд байх зүйл алга. Газпромын зүгээс бодит байдлыг танилцуулсан. Хийн шугамд нэн даруй засварлах шаардлагатай гэмтэл гарсан бөгөөд хориг гэж нэрлэгдсэн хууль бус хязгаарлалтуудаас улбаалан зохиомол хүндрэлүүд тулгарч байна. Энэ асуудлын хүрээнд ОХУ-ын талаас хийж чадах зүйл тун өчүүхэн” гэсэн юм.

Норд Стрийм шугамын хувьд өнгөрөгч зургаадугаар сарын дундаас нийт хүчин чадлын ердөө 40 хувиар ажиллах болсон бөгөөд хийн турбиныг сольсон ч хүчин чадлын 20 хувиар ажиллах болсон билээ. Улмаар ОХУ-ын Европ тивд нийлүүлэх хийн хэмжээ эрс буурч, Европын Комиссын зүгээс ОХУ-ыг байгалийн хийг зэвсгийн журмаар ашиглаж байна гэж буруутгаж байгаа юм. Харин ОХУ-ын талаас барууны орнуудын тавьсан хоригоос үүдэн тэд хийн шугамын үйл ажиллагааны хүрээнд шаардлагатай засвар, үйлчилгээг тухай бүрд нь авч чадахгүй байна гэж мэдэгдэж байгаа билээ.

Эх сурвалж: ТАСС