ОХУ Украинд түрэмгийлснээс үүдэн “тэнгэрт хадах” болсон газрын тосны үнэ ханшны ачаар ихээхэн ашиг хүртэж буй тус салбарын компаниудад өндөр татвар ногдуулах уриалга газар авч байгаа энэ үед НҮБ-ын Ерөнхий нарийн бичгийн дарга ч газрын тос, байгалийн хийн компаниудыг хатуу шүүмжилжээ.
НҮБ-ын Ерөнхий нарийн бичгийн дарга Антониу Гутерриш орон нутгийн цагаар 3-ны өдөр АНУ-ын Нью-Йорк хотноо орших НҮБ-ын төв байранд хийсэн хэвлэлийн бага хурал дээр хэлэхдээ, "Газрын тос, байгалийн хийн компаниуд эрчим хүчний энэхүү хямралын үеэр хямралд хамгийн өртөмтгий бүлэг болох нэн ядуу хүмүүс болон нийгмээр памжуулан асар их ашиг хүртэж буй нь ёс суртахуунгүй үйлдэл юм" гэжээ.
"Миний зүгээс бүх улс орны засгийн газруудад хандан эдгээр компаниудын гэнэтийн илүүдэл ашгаас татвар авч, хүнд хэцүү энэ үед хамгийн эмзэг бүлгийн иргэддээ туслахад зарцуулахыг уриалж байна" гэж тэрээр цохон тэмдэглэв.
Ерөнхий нарийн бичгийн дарга Гутерриш эрчим хүчний томоохон компаниудын нийлбэр ашиг энэ оны эхний улиралд л гэхэд 100 тэрбум ам.долларт хүрч байгааг онцлоод гэнэтийн ашгийн татварыг нэвтрүүлэх шаардлагатайг дурдсан байна.
Тэрээр ялангуяа газрын тосны компаниудын энэхүү аймшигт шунал нь бидний цорын ганц гэр болох эх дэлхийг минь сүйрүүлж байгаагийн дээр хамгийн ядуу, эмзэг бүлгийн хүмүүст шийтгэл болж байна хэмээн хатуухан шүүмжлээд авчээ.
Эх сурвалж: YTN