Лхагва гарагт Туркийн статистикийн байгууллагаас танилцуулснаар, долоодугаар сард тус улсын инфляц 79.6 хувь буюу сүүлийн 24 жилийн дээд түвшинд хүрчээ. Тус улсын хувьд өнгөрөгч онд ерөнхийлөгч Эрдоган бодлогын хүүгээ эрс бууруулснаар инфляц эрчимтэй өсөх болсон юм.
Ройтерс агентлагийн зүгээс Туркийн долоодугаар сарын инфляцыг зургаадугаар сараас даруй 2.9 хувиар өссөн үзүүлэлттэй байна гэж таамаглаж байсан ч энэ үзүүлэлт 2.37 хувьтай гарсан байна.
Инфляцын хамгийн их өсөлт тус улсын тээврийн салбарт бүртгэгдсэн бөгөөд тус салбарын инфляц 119.11 хувьд хүрсэн юм. Үүний дараагаар хүнс, алкогольгүй уух юмсын инфляц 94.65 хувьтай гарчээ.
Туркийн үндэсний мөнгөн тэмдэгт лирийн хувьд 2021 онд ам.доллартой харьцах ханшийн 44 хувийг алдаж, суларсан бол энэ он гарсаар дахин 27 хувиар суларчээ. Тийнхүү өдгөө 1 ам.долларыг 17.9560 лирээр худалдан авч байгаа юм.
Турк улсын инфляцын хувьд өмнө нь 1998 онд л 80.4 хувьд хүрч байжээ.
Эх сурвалж: Al Jazeera