Британийн Post Office компаниас боловсруулсан судалгаагаар Их Британи улсад бараа бүтээгдэхүүний үнэ нэмэгдэх болсноор хүмүүс мөнгөө илүү хямгатай зарцуулах болж, банкны картын оронд бэлэн мөнгө хэрэглэх нь нэмэгджээ.

Улмаар өнгөрөгч сард тус компанийн шуудангийн постууд нийт 801 сая фунтийн бэлэн мөнгөний гүйлгээ хийсэн нь сүүлийн таван жилийн хугацаан дахь хамгийн өндөр үзүүлэлт болсон байна. Уг үзүүлэлтийг өнгөрөгч оны мөн үетэй харьцуулбал 20 хувиар өсжээ.

Их Британи улсын хувьд бараа бүтээгдэхүүний үнэ сүүлийн 40 жилийн хугацаан дахь хамгийн хурднаар өсөж байгаа бөгөөд амьжиргааны өртөг ард иргэдийн орлогыг давах болсноор хүмүүс ийн бэлэн мөнгөний хэрэглээнд шилжиж байгаа гэнэ.

Үйл явдлын хүрээнд Британийн “Cash Action Group”-ийн тэргүүн Натали Сийнигийн мэдэгдсэнээр, “Бэлэн мөнгөний хэрэглээ ийн өсөх болсон нь ард иргэд зоос нэг бүрийг хямгадаж байгаагийн илрэл. Үүний гол шалтгаан нь манай улсын амьжиргааны өртөг эрс нэмэгдэж, хямралын түвшинд хүрсэнтэй холбоотой. Улмаар ард иргэд олсон орлогоо бэлэн мөнгөнд хувиргаж, үүнийг хэрэглээний зардалд, үүнийг хоол хүнсэнд, үүнийг би үрж болох юм байна хэмээн хувааж байгаа юм. Учир нь бэлэн мөнгө бол хэрэглээгээ хянах, мөнгө хэмнэх шалгарсан арга” гэжээ.

Эх сурвалж: BBC