Испани улсад тохиосон цаг агаарын хэт халалт тус улс дахь чидун жимсний үйлдвэрлэлд нөлөөлж, үнэ нэмэгдэхэд хүргэжээ. Энэ талаар Их Британийн томоохон хүнсний дэлгүүрүүдэд чидун жимсний тос нийлүүлэгч Acesur компаниас BBC сувагт мэдээлсэн байна.

Тус компанийн экспорт хариуцсан менежер Мигель Колменерогийн хэлснээр учир явдлын улмаас тэдний харилцагч байгууллагууд худалдан авалтын гэрээгээ шинэчлэхэд чидун жимсний тос 20-25 хувийн нэмэгдэлтэй үнээр хэрэглэгчдэд хүрэх гэнэ.

Испани улсын хувьд дэлхийн чидун жимсний тосны бараг тал хувийг нь үйлдвэрлэн нийлүүлдэг юм. Тэд өнгөрсөн жил нийт 1,4 сая тонн тос үйлдвэрлэж байсан бол өдгөө ердөө 1 сая хүрэхгүй тонн тос үйлдвэрлэх төлөвтэй байгаа гэжээ.

Acesur компанийн хувьд жилд 200000 гаруй тонн чидун жимсний тосыг үйлдвэрлэдэг бөгөөд үйлдвэрлэсэн тосоо дэлхийн 100 гаруй оронд нийлүүлдэг байна.

Мигель Колменерогийн нэмж өгүүлснээр, ирэх саруудад цаг уурын байдал хуурай байх аваас дараа улирлын ургацад бас нөлөөлнө гэсэн юм.

Эх сурвалж: BBC