Мягмар гарагт ХБНГУ-ын үндэсний агаарын тээвэрлэгч Луфтхансагийн мэдэгдсэнээр тус авиакомпани ирэх оны гуравдугаар сарын 25-ны өдрийг хүртэл ОХУ-ын агаарын орон зайг нислэг үйлдэхдээ ашиглахгүй гэжээ. Шийдвэрийн гол шалтгаан нь ОХУ-ын Украин улсад зохион байгуулж буй цэргийн тусгай ажиллагаа гэнэ.

Тэдний мэдэгдсэнээр, “Өнөөгийн нөхцөл байдалд үндэслэн Луфтханса 2023 оны гуравдугаар сарын 25-ны өдрийг хүртэл Оросын агаарын орон зайг ашиглахгүй. Улмаар бид дээрх хугацаанд Герман-Орос-Герман чиглэлийн бүх нислэгээ цуцлах ёстой боллоо.

Бидний зүгээс нөхцөл байдлыг анхааралтай ажиглаж, үндэсний болоод олон улсын эрх баригчидтай нягт холбоотой ажиллаж байна.

Бид мөн Украин улс руу үйлдэх нислэгээ бүгдийг нь зогсоосон. Учир нь одоогийн байдлаар Украин улсын агаарын орон зай хаалттай байгаа бөгөөд тэдний агаарын орон зайгаар нэг ч нислэг дамжин өнгөрөхгүй байгаа.

Луфтханса авиакомпани нөхцөл байдлыг сайтар ажиглаж, цаашид тус улсыг зорих нислэгүүдээ үргэлжлүүлэх эсэхийг шийднэ” гэжээ.

Эх сурвалж: ТАСС