Лхагва гарагт Украины Үндэсний мэдээллийн агентлагаас мэдээлснээр өнгөрөгч сард тус улс дахь хэрэглэгчийн үнийн индекс 22.2 хувьд хүрч, сүүлийн 6.5 жилийн хугацаан дахь хамгийн өндөр үзүүлэлтээр бүртгэгджээ.
Украин улсын хувьд зургаадугаар сард инфляцын түвшин нь 21.5 хувьтай байсан юм. Улмаар нэг сарын дотор тус улс дахь хэрэглэгчийн үнийн индекс 70 суурь нэгжээр өсжээ.
Харин тус улсын суурь инфляцыг зургаадугаар сарын үзүүлэлттэй харьцуулахад 1.2 хувиар өссөн бол энэ оны эхэн үетэй харьцуулахад 12.7 хувиар өссөн байна.
Украин улсын инфляц хамгийн сүүлд 2016 оны хоёрдугаар сард л 22 хувийг давж байсан юм. Гэхдээ тус улсын үндэсний банкнаас урьдчилан таамагласнаар энэ онд инфляц 30 хувь давахгүй гэжээ.
Эх сурвалж: ТАСС