Лхагва гарагт Ройтерс агентлагийн мэдээлснээр, Энэтхэгийн компаниуд Оросын нүүрсийг худалдан авахдаа төлбөрийг юань болон дирхамаар төлж байна гэжээ.
Энэтхэг улсын хувьд сүүлийн хэдэн сарын хугацаанд ОХУ-аас импортлох нүүрсний хэмжээгээ үлэмж нэмэгдүүлсэн юм. Ройтерс агентлагаас онцолсноор тус бүс нутгийн банкнууд, худалдаачид барууны орнуудын ОХУ-ын эсрэг тавьсан хоригийг зөрчихөөс зайлсхийхдээ худалдан авалтын төлбөрийг доллароос бусад валютаар хийх нь бараг ёс болсон гэнэ.
Улмаар зургаадугаар сард л гэхэд Энэтхэгийн компаниуд дор хаяж 742,000 тонн нүүрсийг доллароос өөр валютаар худалдан авсан байна. Ройтерс агентлагийн мэдээлж байгаагаар энэ нь тухайн сард Энэтхэг улсын ОХУ-аас импортолсон нийт түүхий эдийн 44 хувийг эзэлж байгаа юм.
Мөн гаалийн бүртгэлээс үзвэл Энэтхэг улс дан ганц юань, дирхам гэлтгүй Хонконг доллар, еврогоор ч төлбөр хийсэн байна.
Эх сурвалж: ТАСС