Америкийн түргэн хоолны сүлжээ ресторан МакДоналдс Украин улс дахь салбаруудаа эргүүлэн нээхээр төлөвлөж байна.

МакДоналдс сүлжээ рестораны Украин дахь салбаруудын хувьд өнгөрөгч гуравдугаар сард үүд хаалгаа барьсан юм.

Тэгвэл сүлжээ рестораны зүгээс мэдэгдсэнээр тэд Украин улсын ард иргэдэд “өчүүхэн ч гэсэн “хэвийн байдлыг”” мэдрүүлэхийн тулд аюулгүйд тооцогдож буй Киев хот болоод Украины баруун хэсэг дэх салбаруудаа үе шаттайгаар нээх болсон байна.

МакДоналдс сүлжээ рестораны хувьд Украин улсад ОХУ-ын цэргийн тусгай ажиллагаа эхлэхээс өмнө нийт 100 гаруй салбартайгаар үйл ажиллагаагаа явуулж байсан бөгөөд гуравдугаар сард үүд хаалгаа барьсан ч тус улс дахь 10000 гаруй ажилтандаа цалинг нь олгосоор байгаа юм.

Үйл явдлын хүрээнд тэд бараа бүтээгдэхүүн нийлүүлэгчид, гэрээт компаниудтайгаа холбогдох болсон ба Украин улс дахь салбарууд эргэн нээгдэхэд үйл ажиллагаа доголдохгүй байх тал дээр анхаарч байгаагаа мэдэгдсэн байна.

МакДоналдс сүлжээ ресторанаас гадна Украин улс дахь KFC, Nike, Zara брэндийн салбар, дэлгүүрүүд үүд хаалга эргүүлэн нээх болжээ.

Эх сурвалж: BBC