Энэ долоо хоногийн эхэнд Украины ерөнхийлөгч Володимир Зеленський Вашингтон Пост сонинд өгсөн ярилцлагадаа барууны орнуудыг Оросын ард иргэдэд хилээ хаахад уриалсан бөгөөд түүний саналыг Эстонийн ерөнхий сайд, Финляндын Гадаад хэргийн сайд нар дэмжсэн юм. Улмаар ХБНГУ-ын зүгээс тус саналыг засгийн газрын гишүүдийн хүрээнд хэлэлцэж, Европын Холбооны ээлжит хурлаар авч үзэхээ мэдэгдсэн билээ.
Тэгвэл уриалгын хүрээнд АНУ-ын Төрийн департментын хэвлэлийн төлөөлөгч хэвлэлийнхэнд хандсан мэдэгдэл хийсэн байна. Мэдэгдлийн хүрээнд тэрээр АНУ Оросын ард иргэдийг хохироох хүсэлгүй байгааг онцолжээ.
Ведант Пателийн хэлснээр, “Виз олгохыг хориглох тухайд гэвэл бидний зүгээс Оросын ард иргэдэд ноцтой хохирол учруулах арга хэмжээ авч хэрэгжүүлэх хүсэлгүй байгаагаа маш тодорхой илэрхийлсэн. Оросын ард иргэд бол бидэнтэй санал зөрж байгаа этгээд биш” гэсэн байна.
Эх сурвалж: ТАСС