Энэ он гарсаар эхний долоон сарын байдлаар АНУ-ын арми болон Японы өөрийгөө хамгаалах хүчний хийсэн хамтарсан сургуулилтын тоо өнгөрсөн оны мөн үетэй харьцуулахад 50 хувиар нэмэгдсэн гэж Японы Нихон Кэйзай Шимбун мэдээлэв.
Японы Батлан хамгаалах яамны мэдээлж буйгаар, өнгөрсөн долоон сарын хугацаанд АНУ-ын арми болон Японы өөрийгөө хамгаалах хүчний хамтарсан сургуулилтын тоо 51-д хүрсэн нь өнгөрсөн оны мөн үед 34-ийг зохион байгуулж байснаас даруй 1.5 дахин ихэссэн үзүүлэлт юм.
Харин 2020 оны эхний 7 сарын хугацаанд 23 удаа хамтарсан сургуулилт хийж байсантай харьцуулахад 2.2 дахин өссөн байгаа юм.
Ийнхүү хамтарсан цэргийн сургуулилтыг ихээр зохион байгуулах болсон шалтгааныг тус сонины редакцын зүгээс ОХУ Украинд халдан түрэмгийлснээс хойш Хятад болон Оросын арми Японы ойролцоо идэвхтэй цэргийн ажиллагаа явуулж байгаагийн дээр Хойд Солонгос тив алгасагч баллистик пуужингийн (ICBM) туршилтыг удаа дараалан хийж байгаатай холбон тайлбарлажээ.
Эх сурвалж: MBC