Украины үр тариан экспорт сэргэснээс хойш хамгийн анх хөдөлсөн эрдэнэ шиш ачаалсан хөлөг онгоцыг Ливаны худалдан авагч нь хүлээн авахаас татгалзсан талаар бид өмнө нь мэдээлж байсан билээ. Тэгвэл тус хөлөг онгоц Сирийн боомтыг чиглэн явж байгаа талаар Ройтерс агентлаг орон нутгийн цагаар 14-ний өдөр мэдээлэв.

Тодруулбал Украины эрдэнэ шиш ачсан "Разони" хөлөг Сирийн Тартус боомтыг чиглэн явсаар тун ойрхон очоод байгаа талаар орон нутгийн далайн тээврийн салбарын эх сурвалж мэдэгдсэн байна.

Энэхүү хөлөг онгоц нь НҮБ болон Туркийн зуучлалын дагуу өнгөрсөн сард Украины үр тарианы экспортыг сэргээх 4 талт хэлэлцээрийг амжилттай хийсний дараа Украины Одесса боомтоос хөдөлсөн анхны хөлөг онгоц юм. Өнгөрөгч 1-ний өдөр Одесса боомтоос хөдөлсөн "Разони" хөлөг 7-ны өдөр Ливаны Триполи хотод ирсэн боловч тээвэрлэлт саатсан тул Ливаны тал ачааг хүлээж авахаас татгалзсан билээ.

Үүний дараа тус хөлөг Турк руу буцаж ирэн 11-ний өдөр Мерсин боомтод бэхлэгдсэн бөгөөд удалгүй Сирийн баруун хойд хэсгийн усан хил рүү хөдөлжээ.

Сири улс нь Украинтай дипломат харилцаагаа тасалсан орнуудын нэг билээ. Учир нь Сири улс нь Украины зүүн бүс нутаг дахь Оросын талыг баримтлагч салан тусгаарлагчдын тунхагласан Бүгд Найрамдах Донецк Ард Улс (БНДАУ) болон Бүгд Найрамдах Луганск Ард Улсын (БНЛАУ) тусгаар тогтнолыг хүлээн зөвшөөрсний улмаас Украины тал эсэргүүцлээ илэрхийлэн өнгөрөгч зургадугаар сард дипломат харилцаагаа таслахаа мэдэгдэхэд Сири ч үүнийг хүлээн зөвшөөрсөн юм.

“Разони” хөлөг ямар нөхцөлтэйгөөр Сири улсыг зорьж буй нь тодорхой бус байгаа бөгөөд Ливан дахь Украины элчин сайдын яам ч эцсийн зогсоол хаана байх талаар ямар нэгэн тайлбар өгөхөөс татгалзсан гэж Ройтерс агентлаг нэмж дурдав.

Үүний зэрэгцээ, НҮБ мөн өдөр мэдэгдэхдээ, үр тарианы экспорт сэргэж эхэлснээс хойш Украины улаан буудай ачсан анхны хөлөг онгоц болох Сормовский өнгөрөгч 12-ны өдөр Украины боомтоос хөдөлж, Туркын Истанбулын боомтод хүрсэн тухай цохон тэмдэглэжээ.

Түүнчлэн Украины 23 мянган тонн үр тариа ачсан НҮБ-ын түрээсийн хөлөг онгоц мөн өдөр Украины боомтоос Этиоп улсыг зорин хөдөлсөн байна.

Эх сурвалж: Yonhap