Их Британи олон улсын худалдааны харилцаагаа сайжруулахын зэрэгцээ дэлхийн ядуурлыг бууруулах, хөгжиж буй орнуудын тусламжаас хараат байдлыг багасгах зорилгоор хөгжиж буй 65 орноос ирэх бараа, бүтээгдэхүүнд ногдуулдаг импортын татвараа хөнгөлөх шийдвэр гаргалаа. Зарим тохиолдолд татварыг бүр тэглэх бөгөөд уг шийдвэр ирэх оны нэгдүгээр сард хэрэгжиж эхэлнэ.
“Хөгжиж буй орнуудын худалдааны схем” хэмээн нэрлэсэн уг хөнгөлөлтөд Их Британид өргөнөөр үйлдвэрлэдэггүй хувцас, гутал, хүнсний бүтээгдэхүүн зэрэг олон зуун нэр төрлийн бараа хамаарна. Энэ бол Африк тивээс Их Британид нийлүүлж буй нийт бараа, бүтээгдэхүүний 99 хувьд нөлөөлөх томоохон шийдвэр юм. Тухайлбал, өвлийн улиралд тариалах боломж тааруу хүнсний бүтээгдэхүүн, ногоо, жимс болон нэхмэл, сүлжмэл эдлэл нийлүүлэхэд давуу тал олгож байна.
Уг хөнгөлөлт эцсийн хэрэглэгчид хүрэхдээ үнийн хувьд илт хямдрахгүй байх магадлалтай. Гэвч хөгжиж буй орнуудын хувьд томоохон өөрчлөлт эхлүүлэх боломжтой юм. Гэвч жагсаалтад багтсан орнуудаас хүний эрх, хөдөлмөрийн зөрчил гаргасан эсвэл уур амьсгалын өөрчлөлтийн эсрэг хүлээсэн үүргээ биелүүлээгүй тохиолдолд хасах заалт бий ажээ.
Эх сурвалж: BBC