Бүтэн нэг жилийн турш хэлэлцсэн “Инфляцын эсрэг хууль”-д Ерөнхийлөгч Жо Байден гарын үсэг зурснаар хүчин төгөлдөр боллоо. Улмаар чинээлэг давхаргаас авах татварын хэмжээг нэмэхээс гадна уур амьсгалын өөрчлөлттэй тэмцэх, иргэдийн эрүүл мэнддээ зарцуулдаг зардлыг бууруулах зэрэг чиглэлд 740 тэрбум ам.доллар зарцуулах юм. Тус хууль ирэх арваннэгдүгээр сард болох завсрын сонгуулиар Ардчилсан намд чамгүй дэмжлэг болно гэж үзэж байна.
Анх 1.75 их наяд ам.долларын төсөвтэй өргөн барьсан “Инфляцын эсрэг хууль” ийнхүү 740 тэрбум ам.доллар буюу харьцангуй багассан өртөгтэй батлагдлаа. Үүний 369 тэрбум ам.долларыг уур амьсгалын өөрчлөлтийн эсрэг тэмцэхэд, 64 тэрбум ам.долларыг эрүүл мэндийн даатгалын зардлыг бууруулахад зориулна. Мөн нэг жилд 1 тэрбум ам.доллароос дээш орлоготой аж ахуй нэгжүүд хамгийн багадаа 15 хувийн татвар төлөх шаардлагатай боллоо.
Уг хуулийн дагуу компаниудаас хүлэмжийн хийн ялгарлаа бууруулахыг шаардахаас илүүтэй сэргээгдэх эрчим хүчний салбарт хөрөнгө оруулахыг дэмжих аж. Харин иргэд цахилгаан автомашин худалдан авсан тохиолдолд татварын хөнгөлөлт, кредит оноо тооцон олгох тухай тусгажээ. Мөн эрүүл мэндийн жороор олгодог эмийг 65 ба түүнээс дээш насныханд харьцангуй хямд үнээр өгөх боломжийг нээж өгч байна.
Эх сурвалж: CNBC