ОХУ нь хуучин ЗХУ-ын цэргийн аюулгүй байдлын эвсэл болох Хамтын аюулгүй байдлын гэрээний байгууллагын (ХАБГБ) гишүүн Казахстан улстай хамтарсан цэргийн сургуулилалт хийхээр бэлтгэж байгаа аж.

Казахстан улсын болон бусад гадаадын хэвлэл мэдээллийн хэрэгслүүдийн орон нутгийн цагаар 20-ны өдөр мэдээлснээр ОХУ-ын ерөнхийлөгч Владимир Путин Казахстаны ерөнхийлөгч Касым Жомарт Токаевтай өмнөх өдөр нь Сочи хотноо уулзах үеэрээ ХАБГБ-ын гишүүн орнуудын хамтын ажиллагааны хүрээнд ОХУ болон Казахстан улсууд хамтарсан цэргийн сургуулилалт хийхээр бэлтгэл хангаж буй талаар онцлов.

Мөн хоёр улс ХАБГБ-ын хүрээнд олон төрлийн арга хэмжээг санаачлан, стратегийн түвшний дипломат харилцаа зэрэг хамтын ажиллагааны талаар өргөн хүрээнд ярилцсан гэж ерөнхийлөгч Путин мэдэгдсэн байна.

Түүнчлэн энэ үеэр ерөнхийлөгч Токаев хоёр орны харилцааг сайжруулах шаардлагатайг цохон тэмдэглээд ирэх 10-р сард Казахстан улсад зохион байгуулагдах Тусгаар улсуудын хамтын нөхөрлөлийн (ТУХН) дээд хэмжээний уулзалтад Путиныг урьжээ. Тус улс нь энэ онд ТУХН-ийг даргалж байгаа юм.

Тэрээр өнгөрөгч зургадугаар сард Украин дахь Оросын салан тусгаарлагчдын байгуулсан Бүгд Найрамдах Донецк Ард Улсын тусгаар тогтнолыг хүлээн зөвшөөрөхгүй гэдгээ мэдэгдсэнээр ОХУ-тай үл ойлголцол үүсээд байсан ч эдүгээ энэ байдал намжсан гэдэг нь тодорхой болов.

Казахстан улс 1992 онд тусгаар тогтносныхоо яг дараахан ОХУ-тай найрамдал, хамтын ажиллагааны гэрээ байгуулсан цагаас хойш өнөөдрийг хүртэл сайн хөршийн найрсаг харилцаатай байсаар ирсэн билээ. Тодруулбал, ОХУ нь Казахстаны худалдааны хамгийн том түнш бөгөөд өнгөрсөн оны байдлаар хоёр орны худалдаа 24.5 тэрбум ам.долларт хүрсэн байна.

Эх сурвалж: Asiae