Норд Пүүл цахилгаан эрчим хүчний биржийн дата мэдээллээс үзэхэд даваа гарагт Европын зарим оронд цахилгаан эрчим хүчний үнэ бүх цагийн үеийн хамгийн өндөр үнэд хүрчээ.
Тодруулбал, Данийн улсын зүүн болон баруун бүсийн нутагт 1 мегаватт цаг эрчим хүчний үнэ 563.81 еврод хүрсэн бол Австри улсад 564.66 евро, Бельги улсад 561.94 еврогийн үнэ хүрсэн байна. Харин ХБНГУ-д 1 мегаватт цаг цахилгаан эрчим хүчийг 563.81 еврогоор авч хэрэглэх болсон бол Францад 571.34 евро, Нидерланд улсад 558.23 еврогоор худалдан авч хэрэглэх болжээ.
Цахилгаан эрчим хүчний үнэ ийн өсөх болсон нь байгалийн хийн үнийн өсөлттэй шууд холбоотой юм. Учир нь даваа гарагт Европын зах зээлд 1000 шоо метр байгалийн хийн үнэ 3000 ам.долларыг давсан байна. Энэ байгалийн хийн үнийн хувьд өнгөрөгч гуравдугаар сараас хойш үзэгдээгүй өндөр үзүүлэлт ажээ.
Эх сурвалж: ТАСС