Усэйн Болт алтан медаль авах эсвэл дэлхийн дээд амжилт тогтоох бүрдээ өвдгөө нугалан хойш налж, хуруугаараа дээш заасан зогсолт авдаг. Тэрбээр уг зогсолтоо дүрсжүүлэн барааны тэмдэгтээр бүртгүүлэх хүсэлтийг АНУ-ын Патент, худалдааны тэмдэгтийн удирдах газарт наймдугаар сарын 17 өдөр гаргасан байна.
Улмаар уг дүрсээ гутал, хувцас, гоёл чимэглэлд хэвлүүлэх зэргээр гуравдагч талд худалдахыг зорьж буй аж. Тэрбээр тэтгэвэрт гарсан учир бизнесээ хөгжүүлэхийг хүсэх нь зүйн хэрэг гэж патентын хуульчид үзэж байна. Болт 12 жилийн өмнө үүнтэй төстэй худалдааны тэмдэгт бүртгүүлэх хүсэлт өгч байсан боловч амжилт олоогүй билээ.
Олимпын найман удаагийн алтан медалийн эзэн, 100 болон 200 метрийн зайд дэлхийн дээд амжилтыг эзэмшсэн хэвээр байгаа тэрбээр 2017 онд Лондон хотод болсон дэлхийн аварга шалгаруулах тэмцээний үеэр зодог тайлсан юм. Түүнээс дахин уралдах эсэхийг асуухад "Зодог тайлсан хүмүүс эргэж ирэхдээ өөрсдийгөө гутааж байхыг олон харсан. Би тэдний нэг болохгүй” гэж хариулжээ.
Эх сурвалж: BBC