Өнөөдөр буюу наймдугаар сарын 24-нд Украин улс тусгаар тогтносон түүхэн тэмдэглэлт өдөр тохиож байгаа билээ.

Тэгвэл эл өдөр Беларусийн ерөнхийлөгч Александр Лукашенко хачирхалтайгаар Украин улсын ард иргэдэд баярын мэнд хүргэжээ.

Беларусь улсын хувьд ОХУ Украины нутаг дэвсгэрт цэргүүдээ оруулж эхэлснээс хойш Оросын гол түнш улсын байр суурийг хашсан бөгөөд тэдний цэргүүдийг өөрийн улсын нутаг дэвсгэрээр дамжуулан Украин улсад нэвтрүүлсэн юм.

Гэсэн хэдий ч энэхүү түүхэн тэмдэглэлт өдөр Александр Лукашенко, “Өнөөдрийн энэхүү зөрчилдөөн хоёр орны ард түмний олон зуун жилийн түүхтэй үнэнч, найрсаг хөршийн харилцааны үндэс суурийг нурааж чадахгүй гэдэгт итгэлтэй байна.

Бидний зүгээс зөвшилцөлд хүрсэн хэлэлцээрийг тэр чигт нь хадгалж, бүх түвшинд найрсаг, харилцан хүндэтгэл бүхий харилцааг хөгжүүлэхийн төлөө байх болно.

Би хувьдаа украинчуудад энх тайван тэнгэртэй, хүлцэнгүй, эр зоригтой, хүч чадалтай байхыг хүсэн ерөөж, нэр төртэй амьдралаа сэргээх үйл хэрэгт нь амжилтыг хүсэж байна” гэжээ.

Эх сурвалж: BBC