АНУ-д холбооны сангаас оюутны сургалтын төлбөрийн зээл авсан 45 сая орчим иргэн бий. Тэднээс нэг жилийн орлого нь 125,000 ам.доллар хүрдэггүй зээлдэгчдийн өрийг 10,000-20,000 ам.доллароор бууруулах шийдвэрийг Жо Байден гаргаад байна.
Уг шийдвэрийн дүнд нийт зээлдэгчийн 32 хувь буюу 14.6 сая иргэн оюутны зээлийн үлдэгдэл өргүй болно. Мөн зээлдэгчдийн 20 орчим хувийг эзэлж буй 20,000 ам.доллар хүртэл зээлтэй иргэд өрнийхөө талаас илүүг төрийн сангаар төлүүлэх нь. Харин 20,000-40,000 ам.долларын оюутны зээлтэй иргэд 21 хувийг эзэлж байна.
Байден 2021 оны нэгдүгээр сард албан тушаалаа авснаас хойш уг асуудал яригдаж эхэлсэн. Гэвч тэрбээр шударга, тэгш байдал болоод инфляцад хэрхэн нөлөөлөх зэрэг боломжит эрсдэлүүдийг судлан өнөөдрийг хүртэл батлалгүй хойшлуулаад байсан юм. Уг шийдвэрийг хэрэгжүүлэхэд Холбооны сан 2022 онд 311 тэрбум ам.доллар зарцуулах шаардлагатай ажээ.
Эх сурвалж: Forbes