Франц улс автомашинаа цахилгаан унадаг дугуйгаар сольж буй хүмүүст олгодог татаасны хэмжээг нэг хүнд 4,000 евро ногдохоор тооцож өсгөлөө. Улмаар байгаль орчин бохирдуулдаг тээврийн хэрэгслээс татгалзан эко унаагаар зорчихыг иргэддээ уриалж байгаа юм.
Тус улс Нидерланд, Герман, Дани зэрэг “дугуйчин” ард түмэнтэй орнуудтай эко хэрэглээгээр өрсөлдөхийн тулд илүү их зүйл хийх шаардлагатайг ойлгожээ. Тиймээс 2021 онд санаачилсан уг татаасны хэмжээг ийнхүү нэмэгдүүлсэн байна. Францын засгийн газар 2024 онд нийт хүн амынхаа есөөс багагүй хувийг унадаг дугуйгаар тогтмол зорчдог болгох зорилт тавьсан. Өдгөө уг үзүүлэлт ердөө гурван хувь байна. Харин Нидерландын хувьд хүн амынх нь 27 хувь унадаг дугуйгаар зорчдог юм.
Анх Литва улс цахилгаан унадаг дугуй, скутер, мопед худалдан авч буй иргэддээ 1,000 еврогийн татаас олгох хөтөлбөр хэрэгжүүлсэн нь өдгөө Францад нэвтрээд байна. Эммануэль Макроны засгийн газар Парис хотыг бүхэлд нь дугуйгаар зорчиход ээлтэй болгох хөтөлбөрүүдэд 250 сая евро зарцуулахаар тооцсон аж. Тус хотын захирагч Анн Идальго ирэх таван жилийн хугацаанд 130 километр дугуйн зам нэмж тавих амлалт өгсөн билээ.
Эх сурвалж: The Verge