Дэлхий дахинаа газрын тосны үнэ эрчимтэй өсөж байгаагаас үүдэн газрын тос олборлогч, боловсруулагч компаниуд энэ онд өндөр ашигтай ажиллах болсон билээ. Тэгвэл тэдгээр компанийн дунд Хятадын төрийн өмчит, газрын тосны гурван томоохон компани ч багтжээ.
Тодруулбал, БНХАУ-ын Синопек, ПетроЧайна, Хятадын Үндэсний оффшор газрын тосны корпорац гэх компаниуд 2022 оны эхний зургаан сарын хугацаанд нийт 3.42 их наяд юанийн орлоготой ажиллаж, 198.72 тэрбум юанийн цэвэр ашиг олсон байна.
Улмаар хагас жилийн орлогын хэмжээг 2021 оны мөн үетэй харьцуулбал 34 хувиар өссөн үзүүлэлттэй гарсан юм. Харин ашгийн хувьд тэд өнгөрөгч оноос даруй 57 хувь илүү ашигтай ажиллажээ.
Ингэснээр гурван компани гурвуул эхний хагасын ашиг, орлогоороо түүхэн дээд амжилтаа эвдсэн байна.
Эх сурвалж: Nikkei Asia