Энэтхэгийн Дели хотод хууль бусаар баригдсан, тус бүр 100 гаруй метр өндөр орон сууцны хоёр цамхгийг шүүхийн шийдвэрээр хяналттай дэлбэлэх арга ашиглан 10 секундэд нураалаа. Улмаар нийт 850 айлын уг орон сууц Энэтхэгт тэсэлсэн хамгийн өндөр барилга болов.
Тус улсын дээд шүүх өнгөрсөн жил эдгээр барилгыг стандарт бус, гал түймрийн аюулгүйн журам зэрэг хэд хэдэн хууль зөрчсөн хэмээн үзэж нураах шийдвэр гаргасан юм. Дэлбэрэлтийн үеэр ойролцоох өндөр барилгуудад иргэд олноор цугларч үйл явцыг ажиглан алга ташиж байлаа. Уг үйл явдал авлигад идэгдсэн барилгын компаниудад тун сайн анхааруулга боллоо гэж үзэж байгаа юм.
Хяналттай дэлбэлэх ажиллагаанд 3,700 орчим килограмм тэсрэх бөмбөг ашигласан бөгөөд ойр орчимд хамгийн бага хохирол учруулахуйц цэгүүдэд нарийн төлөвлөж барилга дотор тараан байршуулжээ. Нураах ажиллагаа өчигдөр орон нутгийн цагаар 2.30 цагт эхэлсэн.
Тэсэлгээний ойролцоох олон мянган өрх 10 орчим хугацаанд зааврын дагуу гэрээсээ түр холдсон байсан. Шаардлагатай барилгуудыг тусгай бүрээсээр бүрж тэсэлгээнд өртөхөөс хамгаалсан аж. Тэсэлгээний дараа гал унтраах анги тоосжилт дарах усалгаа хийж байлаа. Улмаар замын хөдөлгөөнийг аажмаар сэргээжээ. Барилгын нуранги болох 80,000 гаруй тонн үлдэгдлийг тэсэлгээний нүх бөглөхөд ашиглан заримыг дахин боловсруулах юм.
Эх сурвалж: The Guardian