Оросын армийн мэдэлд ороод буй Украины Запорожье атомын цахилгаан станцаас цацраг идэвхт бодис алдагдах эрсдэл нэмэгдэж байгаа тул Европын холбооны зүгээс цацраг идэвхт бодисыг хүний биед шингээхээс сэргийлэх зорилготой эмийг Украинд хандивлахаар болжээ.

Европын холбооны гүйцэтгэх засаглалын байгууллага болох Европын комисс орон нутгийн цагаар 30-ны өдөр Украины ард түмнийг хамгаалахын тулд калийн иодид шахмал 5.5 сая ширхэгийг хандивлахаар шийдсэнээ мэдэгдэв.

Атомын цахилгаан станцаас цацраг идэвхт туяа алдагдах үед цезий, стронций, цацраг идэвхт иод зэрэг хорт бодисууд ялгардаг байна.

Цацраг идэвхт иод нь бамбай булчирхайд хуримтлагдаж хүний ​​биед гэмтэл учруулдаг ба калийн иодид шахмалыг ууснаар бамбай булчирхайг дэмжиж, цацраг идэвхт иод хуримтлагдахаас сэргийлдэг.

Европын холбооны Хүмүүнлэгийн тусламж, хямралын удирдлагын асуудал эрхэлсэн комиссар Янес Ленарчич “Ямар ч атомын цахилгаан станцыг дайны талбар болгон ашиглах ёсгүй” гэж мэдэгджээ.

"Энгийн иргэдийн амь насанд аюул учруулахыг хэрхэвч хүлээн зөвшөөрөхгүй" хэмээн тэрээр үргэлжлүүлээд Запорожье атомын цахилгаан станцыг тойрсон бүх цэргийн ажиллагааг нэн даруй зогсоохыг уриалав.

Нэг цогцолборт Европын хамгийн том атомын цахилгаан станц болох Запорожье станцыг энэ оны 3-р сард Оросын зэвсэгт хүчин эзэлсэн ба одоогоор Украины мэргэжилтнүүд үйл ажиллагааг нь хариуцан ажиллаж буй юм.

Эх сурвалж: SBS