Мягмар гарагт ОХУ-ын засгийн газраас Японы Мицуи компанид Сахалин-2 төслийн шинэ операторын 12.5 хувийн хувьцааг шилжүүлэхээр баталжээ.
Холбогдох тогтоолыг тус улсын ерөнхий сайд Михаил Мишустин үзэглэн баталсан бөгөөд Оросын хууль эрх зүйн мэдээлэл бүхий албан ёсны веб хуудаснаа нийтэлсэн байна.
Улмаар Сахалин-2 төслийн шинэ оператор болох Сахалин Энержи компанид шилжүүлгийг гүйцэлдүүлэхэд шаардлагатай бүх л бичиг баримтыг бэлдэхийг даалгажээ.
ОХУ Украиныг эзлэн түрэмгийлсэнтэй холбогдуулан барууны орнууд Оросын эсрэг хориг арга хэмжээ авснаас хойш буюу энэ оны зургаадугаар сарын сүүлчээр ОХУ-ын ерөнхийлөгч Владимир Путин "Сахалин-2” төслийн оператор компанийг солих тухай тогтоолыг баталж, энэ сарын 5-ны өдөр шинэ оператор бүхий компанийг байгуулсан юм. Тиймээс төслийн өмнөх хувьцаа эзэмшигч нар шинэ оператортай гэрээгээ шинээр байгуулах шаардлага үүссэн бөгөөд ирэх сарын 4-ний дотор хариу мэдэгдэхийг хүсжээ.
Хүсэлтийн хариуд Японы Мицуи компани хувьцаагаа хадгалж үлдэх хүсэлтэйгээ илэрхийлсэн бол Мицубиши компани тодорхой шийдвэрт хүрээгүй байгаа юм.
Эх сурвалж: ТАСС