Snap-ийн хувьцааны ханш энэ онд 80 хувиар унасан. Улмаар нийт ажиллах хүчнийхээ 20 хувь буюу 1,300 орчим ажилтнаа цомхотгохоор болжээ. Хэдэн долоо хоногийн турш бэлдсэн цомхотголын ажиллагаа өнөөдөр буюу Лхагва гарагт эхэлж байна.

Тус компани 2017 онд Zenly хэмээх найзуудтайгаа байршлаа хуваалцдаг нийгмийн сүлжээний аппликейшн худалдан авсан. Гэвч одоо тус апп хөгжүүлэгчдийг үлэмж хэмжээгээр цөөрүүлэх болсон тул цаашид хөгжүүлэлт удааширна гэх таамаг байна. Мөн мини аппликейшн хөгжүүлэлтийн баг, дотроо компьютерын дэлгэцтэй AR нүдний шил бүтээгч Spectacles, дрон камер Pixy зэрэг олон төслийн баг агшиж байна. Snap-ийн зар сурталчилгаа хариуцсан захирал Жереми Горман Netflix рүү шилжсэний улмаас маркетингийн хэсэг мөн бүтцийн өөрчлөлт хийх юм.

Snap цар тахлын их хөл хорионы үед ажиллах хүчээ эрс нэмсэн билээ. 2020 оны нэгдүгээр улиралд 3,500 орчим ажилтантай байсан бол 2022 оны хоёрдугаар улиралд 6,500 орчим ажилтантай болсон байв. Тэдний олонх нь 2021 онд AR дэлгэц нийлүүлэгч компани WaveOptics-ийг худалдан авсантай холбоотойгоор Snap руу шилжсэн билээ.

Эх сурвалж: The Verge