Los Angeles Lakers цэнгэлдэх хүрээлэнг ивээн тэтгэж, жүжигчин Мэтт Дэймонтэй хамтран ажилладаг Crypto.com криптовалютын бирж нэгэн австрали эмэгтэйд 100 австрали доллар шилжүүлэх гэж байгаад санаандгүй алдаа гарган 10.5 сая австрали доллар шилжүүлжээ.
Ажилтан мөнгөн дүн бичих хэсэгт хүлээн авагчийн дансны дугаар шивснээр 10,474,143.00 австрали доллар шилжүүлсэн аж. Хачирхалтай нь, тус бирж ийнхүү алдаа гаргаснаа долоон сарын турш мэдээгүй бөгөөд 2021 оны арванхоёрдугаар сарын сүүлчээр аудитын шалгалт орох үеэр анх анзаарсан байна. Харин тэр үед шилжүүлсэн мөнгөнийх нь томоохон хэсэг алга болсон байлаа. Санаандгүй орж ирсэн мөнгийг хүлээн авсан хэрэглэгч Деваманогари Манивел мөнгөө өөр данс руу шилжүүлэн хэрэглэсэн аж. Тэрбээр 1.3 сая австрали доллароор эгчдээ тансаг байр худалдан авч өгчээ.
Өдгөө crypto.com мөнгөө буцаан авахаар шүүхээр заргалдаж байгаа бөгөөд компанийн зүгээс Манивелын дансыг царцаах шийдвэрийг гаргуулж чадсан. Мөн шүүхээс Манивелыг байраа борлуулж, хэрэглэсэн мөнгөө хүүгийн хамт эргүүлэн төлөх шийдвэр гаргаад байна. Гэвч тус хэрэг ирэх аравдугаар сард дараачийн шатны шүүхэд шилжин зарга үргэлжлэх болно. Crypto.com энэ тухайд ямар нэг тайлбар өгөхөөс татгалзсан хэвээр байна.
Эх сурвалж: The Verge