ОХУ Украиныг эзлэн түрэмгийлж эхэлснээс хойш дэлхий дахинаа бараа бүтээгдэхүүний үнэ эрчимтэй өсөх болсноор өнгөрөгч сард Евро бүсийн инфляц 9.1 хувьд хүрчээ. Энэ нь тус бүсийн хувьд урьд өмнө бүртгэгдэж байгаагүй өндөр үзүүлэлт юм.
Инфляцын түвшин ийн өсөлттэй гарснаар Европын төв банк бодлогын хүүгээ дахин нэмэх талаар авч үзэхээс өөр аргагүйд нөхцөл үүссэн байна. Гэвч бодлогын хүүг нэмэх нь инфляцын өсөлттэй тэмцэх ч эдийн засгийн өсөлтийг удаашруулдаг сөрөг талтай билээ.
ОХУ Украинд дайн эхлүүлснээр дан ганц Евро бүс гэлтгүй бусад оронд ч инфляц эрчимтэй өсөж байгаа юм. Жишээлбэл, Их Британи улсад л гэхэд эрчим хүчний хэрэглээний төлбөр 80 хувиар өссөн бол АНУ-д инфляц 8.5 хувьд хүрчээ.
Улс орнуудын зүгээс инфляцын өсөлтийг бараа бүтээгдэхүүний нийлүүлэлтийн тасалдал болоод эрчим хүчний үнийн өсөлттэй холбон тайлбарлаж байгаа юм. Харин Евро бүсийн хувьд инфляц ийн өсөх болсон өөр нэг шалтгаан нь еврогийн ам.доллартой харьцах ханш унаж байгаатай холбоотой ажээ. Учир нь Евро бүс импортын бараа бүтээгдэхүүн, нэн ялангуяа газрын тосыг ам.доллароор худалдан авдаг юм.
Эх сурвалж: AP News