Google сагсан бөмбөгийн спортод оруулах хөрөнгө оруулалтынхаа хэмжээг нэмэгдүүлж, дэлхийд анх удаа Олон улсын Сагсан бөмбөгийн Холбооны зөвхөн эмэгтэй ангиллыг түншлэх глобал түнш болжээ.
Google компанийн хувьд 2021 онд WNBA буюу Эмэгтэйчүүдийн Үндэсний Сагсан бөмбөгийн Холбоотой хамтран ажиллах олон жилийн гэрээг байгуулсан бол өдгөө ийнхүү сагсан бөмбөгийн дэлхийн холбоотой хамтран ажиллах болсон байна. Тус холбоо нь эрэгтэй, эмэгтэй ангилалд нийт 9 глобал түнштэй үйл ажиллагаа явуулдаг байсан бол Google компанитай хамтарснаар эмэгтэй ангилалд 10 глобал түнштэй болж байгаа ажээ.
Үйл явдлын хүрээнд FIBA(Олон улсын Сагсан бөмбөгийн Холбоо)-ийн ерөнхий нарийн бичгийн дарга Андреас Загклисын мэдэгдсэнээр, “Google компани сагсан бөмбөгийн эмэгтэй ангилалд түншлэх болсноор эмэгтэйчүүдийн сагсан бөмбөгийн спортыг өргөн цар хүрээнд таниулахаас гадна энэ спортод дурладаг сонирхогч хийгээд мэргэжлийн тоглогч эмэгтэйчүүдэд хүлээн зөвшөөрөгдсөн мэдрэмжийг өгч байгаа юм. Цаашид Google шиг томоохон компаниуд эмэгтэйчүүдийн сагсан бөмбөгийн спортод итгэл хүлээлгэсээр байвал бидний олон жилийн хөдөлмөр бодит үр дүнд хүрсэн хэрэг болно” гэсэн юм.
Тийнхүү талуудын хамтын ажиллагаа энэ сард Сидней хотноо зохион байгуулагдах дэлхийн аваргын тэмцээнээр эхлэх ажээ.
Эх сурвалж: AP News