Индонезийн засгийн газраас шатахуунд олгодог татаас хэт өндөр зардалтай болсон тул тодорхой хувийг зогсоожээ. Улмаар Бямба гарагт шатахууны ханш улс даяар 30 орчим хувиар нэмэгдлээ.
Шатахуунд татаас олгож байсан нь Индонезийн инфляцыг дэлхийн хамгийн доод түвшинд барьж байсан. Гэвч олон улсын зах зээлд газрын тос, байгалийн хийн үнэ өссөөр өдгөө 2022 оны анхны төсвөөс гурав дахин нэмэгджээ. Ийнхүү улсын төсөвт 34 тэрбум ам.долларын дарамт учруулах болсон тул шатахууны үнийг нэмэх шийдвэр гаргахаас өөр аргагүйд хүрсэн аж. Улмаар бензиний үнэ литр тутамд 51 центээс 67 цент, дизель түлшний үнэ 35 центээс 46 цент болж нэмэгдсэн. Тус улсад сүүлийн найман жил шатахууны ханш ингэж эрс нэмэгдээгүй юм.
Индонезийн төрийн өмчит компани Pertamina нь АИ90 шатахууны үнээ нэмэгдүүлэх гэж буй тухай иргэд сүүлийн хэдэн долоо хоногийн турш санаа чилээж байсан. Улмаар шатахуун түгээх станцуудын гадна үнэ нэмэгдэхээс өмнө түлшээ нөөцлөхийг хүссэн иргэд олон цагаар урт оочир үүсгэсээр байсан билээ.
“Засгийн газар түлшний үнийг тогтоон барихын тулд чадах бүхнээ хийсэн. Нөхцөл байдал хэдий хүнд байвч төр гаргах ёстой шийдвэрээ гаргах л хэрэгтэй” хэмээн Ерөнхийлөгч Жожо Видодо хэллээ.
Эх сурвалж: AP