Тайвань ойрын 10 жилийн хугацаанд 400,000 ажиллах хүчнийг гадаадаас татах төлөвлөгөөгөө зарлалаа. Тайванийн Үндэсний хөгжлийн зөвлөлийн дарга Кун Мин Шин өнгөрсөн сарын 31-нд болсон форумын үеэр “Улс орны аж үйлдвэрийн салбар дахь ажиллах хүчний хомсдолыг нөхөхөд гадны орнуудаас ажиллах хүчнийг илүү ихээр авчрах шаардлага үүсэх нь тодорхой болоод байна” хэмээн онцолсныг Хонконгийн South China Morning Post сонин орон нутгийн цагаар 2-ны өдөр мэдээлжээ.
Түүний хэлж буйгаар улс орны эдийн засгийн өсөлтийг хангадаг долоон салбарт гадны орнуудаас ажиллах хүч авахаар төлөвлөж байгаа аж. Тодруулбал эдгээр салбаруудад ухаалаг техник технологи, биотехнологи, сэргээгдэх эрчим хүч, үндэсний батлан хамгаалах, орчин үеийн хөдөө аж ахуй, тойрог эдийн засаг буюу хаягдалгүй эдийн засаг зэрэг салбарууд багтаж байгаа гэв.
Тайвань ийнхүү гадны орнуудаас олон тооны ажиллах хүчин авчрахаар төлөвлөж буйн шалтгаан тус улсад төрөлт багасч, хүн амын насжилт эрчимтэй нэмэгдэж буйн улмаас хөдөлмөр эрхлэх чадвартай хүн амын тоо хурдацтай буурч байгаатай холбоотой.
Тайванийн Үндэсний хөгжлийн зөвлөлөөс гаргасан судалгаанд дурдаснаар 2040 он гэхэд 65 ба түүнээс дээш насны хүн ам нийт хүн амын 30 хувийг эзлэх бол одоогоор 23.19 сая хүн амтай тус улс 2052 он гэхэд 20 сая хүрэхгүй хүн амтай болно хэмээн таамаглал дэвшүүлжээ. "Хүн амын насжилт нэмэгдэхийн хэрээр албан байгууллагуудад хүний нөөцийн асуудал улам ихсэх болно" хэмээн тэрээр онцлон тэмдэглэсэн байна.
Эх сурвалж: Maeil