Япон улсын Эдийн засаг, худалдаа, аж үйлдвэрийн сайд Нишимура Ясутоши өнгөрөгч бямба гарагт Индонез улсад зохион байгуулагдсан “Их 20” бүлгийн уулзалтын дараагаар CNBC сувагт ярилцлага өгчээ.
Ярилцлагад өгүүлснээр ноён Ясутоши цөмийн эрчим хүч бол Япон улсын эрчим хүчний аюулгүй байдал, нүүрстөрөгчийн хийг саармагжуулах зорилтын гол түлхүүр гэсэн байна.
Түүний хэлснээр, “Бидний зүгээс эрчим хүчний аюулгүй байдлаа хангахын зэрэгцээ нүүрстөрөгчийн хийг бууруулахаар ажиллаж буй энэ үед цөмийн эрчим хүч маш чухал үүрэгтэй гэдэгт би итгэж байгаа. Улмаар бид цөмийн эрчим хүчнээс хамаарах хамаарлаа нэмэгдүүлэхээр төлөвлөж байна” гэжээ.
Нүүрстөрөгчийн хийг бууруулахад цөмийн эрчим хүчийг ашиглах нь маш үр дүнтэй аргуудын нэг бөгөөд тавдугаар сард тус улсын ерөнхий сайд Кишида Фумио эрчим хүчний нийлүүлэлт, үнийг тогтворжуулахын тулд цөмийн цахилгаан станцуудаа эргүүлэн ажиллуулах болсноо мэдэгдэж байсан юм.
Ноён Ясутошигийн хэлснээр Япон улс өдгөө 10 цахилгаан станцыг эргүүлэн ажиллуулахаар бэлтгэл ажлыг хангасан ба ирэх жил дахин долоон станцыг ажиллуулах гэнэ.
Ташрамд дурдахад одоогийн байдлаар Япон улс эрчим хүчний нийт хэрэгцээний 94 хувийг импортлон авч хэрэглэж байгаа юм.
Эх сурвалж: CNBC