Франц, Герман улсууд эрчим хүчний хямралыг даван туулахын тулд цахилгаан болон байгалийн хийгээ харилцан солилцох тал дээр хамтран ажиллахаар тохиролцжээ.

Францын ерөнхийлөгч Эммануэль Макрон орон нутгийн цагаар 5-ны өдөр Германы канцлер Олаф Шольцтой ярилцсаны дараа хийсэн хэвлэлийн бага хурал дээр ийнхүү мэдэгдэв. Тодруулбал шаардлагатай тохиолдолд Франц улс Герман руу хий нийлүүлэх бол Герман Франц руу цахилгаан, эрчим хүч нийлүүлэх гэнэ. Францын атомын цахилгаан станцууд техникийн саатлын улмаас тал орчим хувь нь зогссон гэж ерөнхийлөгч Макрон мэдэгдээд хөрш орнуудаас тусламж авах шаардлагатай байгаа бөгөөд Герман руу хий дамжуулахад шаардлагатай холболтыг ойрын хэдэн сарын дотор барьж гүйцэтгэнэ гэжээ.

Макрон мөн Европын холбооны хэмжээнд эрчим хүчний үнийг хянах арга хэмжээ авахыг уриалж, хэрэв Европын холбоо ОХУ-ын хоолойгоор дамжих байгалийн хийн үнийн дээд хязгаарыг тогтоовол дэмжинэ гэдгээ мэдэгдэв. Европын холбооны эрчим хүчний сайд нар ирэх 9-ний өдөр яаралтай хуралдаж, эсрэг арга хэмжээний талаар хэлэлцэнэ.

Ерөнхийлөгч Макрон Франц улс өвлийн улиралд цахилгаан, эрчим хүчний хямрал үүсэхээс сэргийлэхийн тулд нийт хэрэнлээгээ ядаж 10 хувиар бууруулах шаардлагатай байгааг дурдаад хэрэв айл өрх аж ахуй нэгжүүд энэ хөдөлгөөнд сайн дураараа нэгдэхээс татгалзвал албадан зохицуулах болно гэж мэдэгдсэн байна. Өвлийн улиралд дотоод орчны температур 19 хэмээс хэтрэхгүй байх ёстойг онцлоод “Хүн бүр бага гэлтгүй үүргээ гүйцэтгэх ёстой” гэлээ.

Түүнчлэн тэрээр Их Британийн дараагийн ерөнхий сайдаар сонгогдоод буй Лиз Трасст хандан "журмын нөхөр холбоотны хувиар бүх салбарт хамтран ажиллахад бэлэн байна" гэдгээ мэдэгдэн баяр хүргэжээ.

Эх сурвалж: Kyunghyang